အုန်းရွှေ

ဦးအုန်းရွှေသည် မြန်မာစာပေနှင့် မြန်မာဘာသာစကားပညာရှင်တစ်ယောက် ဖြစ်ပြီး ဦးဖိုးလတ်၊ မြန်မာစာပါမောက္ခ ဦးဧမောင်၊ ဒဂုန်ဦးလှဘေ၊ မင်းသုဝဏ် တို့နှင့်လည်း ရင်းနှီးခင်မင်သည်။ ဆရာကြီးသည် သတ်ပုံအဘိဓာန်မိတ်လင်စုံ၊ဝဏ္ဏဗောဓနအဘိဓာန်၊ မြန်မာဝေါဟာရလက်စွဲသတ်ပုံ၊ မွေ့နွန်းရကန် ခက်ဆစ်အဖြေ၊ ရာမရကန် ခက်ဆစ်အဖြေ၊ နတ်ရှင်နောင်ရတုပေါင်းချုပ် ခက်ဆစ်အဖြေ၊ စာဆိုတော်စုံရတုပေါင်းချုပ် ခက်ဆစ်အဖြေတို့ကို ​ရေးသားပြုစုခဲ့သည်။ မြန်မာနိုင်ငံသုတေသအသင်း၌ အဖွဲ့ဝင်ဖြစ်သည့်အလျောက် တောင်ငူဆိုရတုအဖြေကို တည်းဖြတ်ပေးခဲ့သည်။ ဟိတောပဒေသကျမ်း၊ သူဇာပျို့၊ ဝေါဟာရတ္ထပကာသနီကျမ်းတို့ကို တည်းဖြတ်၍ အမှာစာရေးပေးခဲ့သည်။ ဝေါဟာရတ္ထပကာသနီကျမ်းကို တည်းဖြတ်သူ ဒဂုန်ဦးထွန်းမြင့်ကိုလည်း အကူအညီများပေးခဲ့သည်။ စာပေဘဏ်ဖြန့်ချိရေးအနေဖြင့် ကဝိကဏ္ဍပါသကျမ်း၊ ဝေါဟာရတ္ထဘေဒကျမ်းနှင့် ဝေါဟာရဝိပ္ပလ္လာသလက္ခဏဒီပကကျမ်းတို့ကိုလည်း လက်ရေးမူကို စာကူးစက်ဖြင့် မူပွား၍လည်းကောင်း၊ လက်နှိပ်စက်မူကို မူပွား၍လည်းကောင်း ထုတ်ဝေခဲ့သည်။ ရာမပြဇာတ်တော်ကြီးကို ပေမူမှတစ်ဆင့်ကူးယူ၍ ရန်ကုန်တက္ကသိုလ်များဗဟိုစာကြည့်တိုက်၌ သိမ်းဆည်းထားခဲ့သည်။