နေရွှေသွေးအောင်

နေရွှေသွေးအောင်
မွေးဖွား	(1991-05-22) ၂၂ မေ၊ ၁၉၉၁ ရန်ကုန်မြို့၊ မြန်မာနိုင်ငံ
နိုင်ငံလူမျိုး	မြန်မာ
အခြား အမည်များ	ဖိုးလပြည့်
ပညာရေး	ရန်ကုန်အနောက်ပိုင်းနည်းပညာတက္ကသိုလ်
အလုပ်အကိုင်	စီးပွားရေးလုပ်ငန်းရှင်
တက်ကြွလှုပ်ရှားနှစ်များ	၂၀၁၀–လက်ရှိ
မိဘ(များ)	နေစိုးမောင် ကြည်ကြည်ရွှေ
ဆွေမျိုးသားချင်း	သန်းရွှေ (အဖိုး) ကြိုင်ကြိုင် (အဖွား)

နေရွှေသွေးအောင် (၂၂ မေ ၁၉၉၁ ဖွား) သည် အငြိမ်းစား ဗိုလ်ချုပ်မှူးကြီး သန်းရွှေ၏ မြေးများအနက်မှ တစ်ဦး ဖြစ်သည်။ သူသည် အမျိုးမျိုးသော စီးပွားရေးလုပ်ငန်းများတွင် ရှယ်ယာ ပါဝင်လုပ်ကိုင်ခြင်းဖြင့်လည်း ကျော်ကြားသည်။ မြန်မာနိုင်ငံတွင် NLD အစိုးရ မအုပ်ချုပ်မီကာလ နှင့် အုပ်ချုပ်ပြီး နောက်ပိုင်း အဘိုးဖြစ်သူနှင့် ဒေါ်အောင်ဆန်းစုကြည် တို့အကြား ပေါင်းကူးတံတားသဖွယ်ဖြစ်ခဲ့သည်။ယင်းအပြင် အငြိမ်း စားယူပြီး လူမြင်ကွင်းမှ ပျောက်ကွယ်နေသော အဘိုးဖြစ်သူ၏ ပုံရိပ်များကို လူမှုကွန်ရက်မှတဆင့် ထုတ်ပြန်ပေးခဲ့သူအဖြစ်လည်း ထင်ရှားသည်။

ငယ်စဉ်ဘဝနှင့် မိသားစု

နေရွှေသွေးအောင်သည် ၁၉၉၁ ခုနှစ် မေ ၂၂ ရက်တွင် ရန်ကုန်မြို့ တွင်မွေးဖွားခဲ့သည်။သူသည် စစ်ဘက်ဆရာဝန် ဒေါက်တာ နေစိုးမောင်နှင့် ဗိုလ်ချုပ်မှူးကြီး သန်းရွှေ ၏ သမီး ကြည်ကြည်ရွှေ တို့၏ တစ်ဦးတည်းသော သားဖြစ်သည်။ဖိုးလပြည့် အမည်ဖြင့် လူသိများသည်။ ရန်ကုန် ပညာရေးတက္ကသိုလ် လေ့ကျင့်ရေးကျောင်း တွင် အထက်တန်းပညာသင်ကြားခဲ့ပြီး၊ရန်ကုန်အနောက်ပိုင်းနည်းပညာတက္ကသိုလ် ကျောင်းဆင်းဖြစ်သည်။ ငယ်စဥ်ကတည်းက သူသည် အဘိုးဖြစ်သူ၏ ပွဲတက်အခမ်းအနားများ၌ အများဆုံးတွေ့ရတတ်သည်။ တစ်ခါတစ်ရံ တရုတ်ခရီးစဥ်ကဲ့သို့သော နိုင်ငံခြားခရီးစဥ်အချို့တွင်လည်း အဘိုးဖြစ်သူနှင့်အတူ လိုက်ပါရလေ့ရှိသည်။ မြေးများအနက် အရေးပါသူတစ်ဦး အဖြစ်လည်း ရှုမြင်ခံရသည်။

စီးပွားရေး အကျိုးစီးပွားများ

နေရွှေသွေးအောင်သည် ၁၉၈၈ နောက်ပိုင်း စစ်အစိုးရအဖွဲ့ဝင်များနှင့် စီးပွားရေးလုပ်ငန်းရှင်များအကြား ဆက်သွယ်ပေးသော အရေးပါပုဂ္ဂိုလ်အဖြစ် လူသိများသည်။ သူသည် အဘိုး ဖြစ်သူ၏ ရာထူးအာဏာကို အသုံးချ၍ စီးပွားရေး အကျိုးအမြတ် ရယူသည်ဟု စွပ်စွဲခံရသည်။ ထို့ပြင် အကြီးတန်း ဗိုလ်ချုပ် များ၏ သားများဖြစ်သော အောင်သက်မန်း နှင့် တိုးနိုင်မန်း တို့နှင့် စီးပွားရေး အငြင်းပွားမှုများလည်း ရှိခဲ့သည်။သူသည် ထင်ရှားသော စီးပွားရေးလုပ်ငန်းရှင် ဇော်ဇော် အပါအဝင် တေဇ ကဲ့သို့သော လုပ်ငန်းရှင်ကြီးများနှင့် နီးကပ်သော ဆက်ဆံရေး ရှိသည်။ ဤဆက်ဆံရေးမှတဆင့် ဇော်ဇော်သည် ကား နှင့် မော်တော်ဆိုင်ကယ် တင်သွင်းခွင့်များ၊ ဆီ ဖြန့်ဖြူးခွင့်များ ရရှိခဲ့သည်။ နေရွှေသွေးအောင်သည် ဘောလုံးအားကစားအပေါ် စိတ်ဝင်စားမှုကြောင့် ဇော်ဇော်က ဗိုလ်လုပွဲဝင် အသင်းဖြစ်သော ဒယ်လ်တာယူနိုက်တက် အသင်းတွင် သူ့ကို ခေါ်ယူခဲ့သည်။ ၂၀၀၇ ခု နှစ် ဇွန်လ ၁၄ ရက်နေ့တွင် ဂျပန်ဘောလုံး ကြယ်ပွင့် ဟီဒေတာရှီ နာကာတာ ပါဝင်သော ပြိုင်ပွဲတွင် သူ့အား ပါဝင်ခွင့်ပြုခဲ့သည်။

နိုင်ငံရေးအတွင်းပါဝင်ပတ်သက်မှု

နေရွှေသွေးအောင်သည် စစ်တပ်ဝန်ထမ်း မဟုတ်သော်လည်း အဘိုးဖြစ်သူ၏ အရေးပေးမှုကြောင့် နအဖစစ်အစိုးရလက်ထက်ကာလအတွင်း ဩဇာအာဏာအထိုက်အလျောက်ရှိခဲ့သည်။အသုံးချလိုသူများ၏ ချဥ်းကပ်မှုမျိုးစုံဖြင့် အသုံးချခြင်းကိုလည်း ခံခဲ့ရသည်။ သူ၏ အဘိုးဖြစ်သူနိုင်ငံရေးမှ အနားယူသည့် ၂၀၁၁ ခုနှစ် နောက်ပိုင်း နေရွှေသွေးအောင်သည် လူမြင်ကွင်းမှ အနည်းငယ်ပျောက်ကွယ်နေခဲ့သည်။၂၀၁၅ ခုနှစ် နိုဝင်ဘာ ၈ရက် တွင် ကျင်းပသည့် အထွေထွေရွေးကောက်ပွဲ ၂၀၁၅ အပြီး အမျိုးသားဒီမိုကရေစီအဖွဲ့ချုပ် အနိုင်ရပြီးနောက် သူသည် မြန်မာ့နိုင်ငံရေးဇာတ်ခုံပေါ် အဘိုးဖြစ်သူ၏ နောက်ခံကိုယ်စားပြုသူတစ်ဦးအဖြစ် လူမြင်ကွင်းရှေ့ ပြန်ရောက်လာသည်။၂၀၁၅ ခုနှစ် နိုဝင်ဘာလ ၁၉ ရက် တွင် ဒေါ်အောင်ဆန်းစုကြည် နှင့် ၎င်းတို့ နေပြည်တော်တွင် တွေ့ဆုံခဲ့ပြီး၊တွေ့ဆုံခဲ့မှုကို ဖေ့စ်ဘွတ်ခ် စာမျက်နှာမှတဆင့် “ဒီနေ့ည သမိုင်းတွင်မယ့် ညတည” အဖြစ် အသိပေးခဲ့မှုသည်လည်း နိုင်ငံရေးလောကအတွင်း ထင်ရှားခဲ့သည်။ယင်းအပြင် ၂၀၁၅ ခုနှစ် ဒီဇင်ဘာလ ၄ရက်တွင် ဒေါ်အောင်ဆန်းစုကြည် နှင့် ဦးသန်းရွှေတို့ နေပြည်တော်ရှိ ဦးသန်းရွှေနေအိမ်တွင်း တွေ့ဆုံခဲ့မှုကို အဘိုး ဖြစ်သူ၏ ပြောကြားချက်ပါ ၂၀၁၅ ရွေးကောက်ပွဲတွင် တရားဝင်အနိုင်ရရှိခဲ့သည့် မြန်မာပြည်၏ အနာဂတ်ခေါင်းဆောင်သည် ဒေါ်အောင်ဆန်းစုကြည်ဖြစ်လာမည်မှာ အားလုံးလက်ခံရမည့် အမှန်တရားပင်ဖြစ်သည် ဆိုသော ပြောကြားချက်ကိုထည့်သွင်းပြီး သူက ထုတ်ပြန်ပေးခဲ့သည်။ ထိုနောက်ပိုင်းကစ၍ သူသည် မြန်မာ့နိုင်ငံရေးအခင်းအကျင်း၌ ဝင်မပါတော့ပေ။

ဂီတသမားဘဝ

နေရွှေသွေးအောင်သည် “ဖိုးလပြည့်” ဟု အနုပညာနာမည်ဖြင့် ကာဗာသီချင်းများ တီးခတ် သရုပ်ဖော်ခဲ့သည်။အဆိုတော် Enrique Iglesias ၏ Tonight I’m Loving တေးသီချင်းကို သင်ဇာဝင့်ကျော်၊ထိုင်းသရုပ်ဆောင်မင်းသမီး ကရာဗီတို့နှင့် တွဲဖက်သရုပ်ဆောင် သီဆိုရုပ်သံကို ၂၀၁၈ ခုနှစ် နိုဝင်ဘာ ၇ရက်တွင် ထုတ်လွှင့်ခဲ့သည်။ သူသည် “Hero” (ဟီးရိုး) အမည်ရှိ သီချင်းဗီဒီယိုတစ်ပုဒ်တွင်လည်း ပါဝင်ခဲ့ပြီး၊ ယင်းဗီဒီယိုသည် ၂၀၁၈ ခုနှစ် ဒီဇင်ဘာ ၂၇ ရက်နေ့တွင် YouTube တွင် တင်ဆက်ခဲ့သည်။ Miss Universe Myanmar 2019 Final တွင်လည်း တေးသီချင်းပါဝင် သီဆိုခဲ့သည်။

အငြင်းပွားမှုများနှင့် စွပ်စွဲချက်များ

နေရွှေသွေးအောင်သည် သူ၏အဘိုး သန်းရွှေ၏ အာဏာရှင်ကာလအတွင်း အမျိုးမျိုးသော အမှုအခင်းများအပြင် နောက်ပိုင်းကာလများ၌ မီဒီယာ၏အာရုံစိုက်မှုကို ခံယူခဲ့ရသည်။ ၂၀၀၉ ခုနှစ် ဇန်နဝါရီလတွင် ထုတ်လွှင့်သည့် အမေရိကန်သံအမတ်၏ အချက်လက်များအရ၊ သူသည် မန်ချက်စတာယူနိုက်တက်အဖွဲ့ကို ၁ ဘီလျံ ဒေါ်လာဖြင့် ဝယ်ယူရန် အဘိုးဖြစ်သူထံ အကြံပြုခဲ့ကြောင်း ဖော်ပြသည်။ သို့သော် နာဂစ်မုန်တိုင်းအပြီး ဝေဖန်မှုများကြောင့် ထိုစီမံကိန်းကို ရပ်စဲခဲ့သည်။ထို့နောက်၎င်းက ချဲလ်စီအသင်းကို မျှော်မှန်းသူဖြစ်ကြောင်း ပြောကြားခဲ့ပြီး၊ မန်ချက်စတာ ယူနိုက်တက်ကို ဝယ်ယူလိုသည့် အစီအစဉ်မရှိကြောင်း ငြင်းဆန်ခဲ့သည်။

ဖခင်ဖြစ်သူအဖမ်းခံရခြင်း

ဒေါက်တာ ဇော်မြင့်မောင်၏ နာရေး ဝမ်းနည်းစကားများဖော်ပြမှုနှင့် စပ်လျဥ်းပြီး ၂၀၂၄ ခုနှစ် အောက်တိုဘာ ၂၃ ရက်နေ့တွင် သူ၏ဖခင် ဒေါက်တာ နေစိုးမောင် စစ်အစိုးရ ၏ ဖမ်းဆီးခြင်းကို ခံရသည်။သူ၏ ဖခင်သည် စစ်အာဏာရှင် ကို ထင်သာမြင်သာ ဆန့်ကျင်သူဖြစ်သည်။ထို့နောက် နေရွှေသွေးအောင်က ၂၀၂၄ ခုနှစ် အောက်တိုဘာ ၂‌‌၆ ရက်နေ့တွင် ဖေ့စ်ဘွတ်ခ် Story တွင် “အဲ့လိုတွေလုပ်လေ ပြည်သူကနာကျည်းလေ.. စဉ်းစားချင့်ချိန်လုပ် ကြပါ” ဟုရေး သားခဲ့သည်။