ဗုဒ္ဓါနုဿတိ
| တစ်စိတ်တစ်ပိုင်း ဖော်ပြချက် |
| ဗုဒ္ဓဘာသာ |
|---|
 |
ဗုဒ္ဓါနုဿတိသည် ဗုဒ္ဓဘာသာ၏ ကမ္မဋ္ဌာန်း (၄၀) အနက် အနုဿတိကမ္မဋ္ဌာန်း (၁၀) ပါး၏ တစ်မျိုးဖြစ်ပြီး၊ ဘုရားရှင်၏ ဂုဏ်တော်များကို အာရုံပြု၍ အဖန်တလဲလဲ အောက်မေ့ပွားများသော ဘာဝနာတရားဖြစ်သည်။ ဗုဒ္ဓါနုဿတိပင် ဖြစ်သည် [၁]။ ဤကမ္မဋ္ဌာန်းသည် ဘုရား၏ ဂုဏ်တော်များကို လေးမြတ်ယုံကြည်မှုဖြင့် စိတ်ကို ငြိမ်သက်စေပြီး သမာဓိကို ဖြစ်ပေါ်စေရန် ရည်ရွယ်သည်။
ဂုဏ်တော်များအနက် တစ်ခုခုကို ရွေးချယ်၍ အာရုံပြုနိုင်သော်လည်း၊ အများအားဖြင့် “အရဟံ” ဂုဏ်တော်ကို အစပြု၍ ပွားများလေ့ ရှိသည်။
“အရဟံ” ၏ အနက်ငါးပါး
[ပြင်ဆင်ရန်]ဝိသုဒ္ဓိမဂ္ဂတွင် “အရဟံ” ဂုဏ်တော်၏ အနက်ငါးမျိုးကို ဖော်ပြထားသည်-
- ကိလေသာမှ အဝေးကြီး ကင်းဝေးသူ - ဝါသနာအငွေ့ဓာတ်နှင့်တကွ ကိလေသာများကို ဖျက်ဆီးနိုင်သည်။
- ကိလေသာဖျက်ဆီးသူ - တစ်ထောင့်ငါးရာကိလေသာကို အရဟတ္တမဂ်ဉာဏ်ဖြင့် ချိုးဖျက်သူ။
- သံသရာစက်ရဟတ် ဖျက်ဆီးသူ - အဝိဇ္ဇာ-တဏှာဦးစီးသော ပဋိစ္စသမုပ္ပါဒ်ကို ချိုးဖျက်သူ။
- ပူဇော်ထိုက်သူ - သီလ၊ သမာဓိ၊ ပညာဂုဏ်ဖြင့် လူ၊ နတ်၊ ဗြဟ္မာတို့၏ ပူဇော်ခံထိုက်သူ။
- ဆိတ်ကွယ်ရာ၌ မကောင်းမှု မပြုသူ - ကိုယ်၊ နှုတ်၊ စိတ်ဖြင့် ပါပမှ ကင်းစင်သူ။ [၂]
ဗုဒ္ဓါနုဿတိ စီးဖြန်းနည်း
[ပြင်ဆင်ရန်]ဗုဒ္ဓါနုဿတိကမ္မဋ္ဌာန်းကို အောက်ပါအဆင့်များဖြင့် ပွားများရသည်-
၁။ သမာဓိထူထောင်ခြင်း
- ယောဂီသည် ရှေးဦးစွာ ဩဒါတကသိုဏ်း သို့မဟုတ် အာနာပါနကမ္မဋ္ဌာန်းဖြင့် စတုတ္ထဈာန်သမာဓိကို ထူထောင်ရသည်။ ထိုသမာဓိမှ ဖြစ်ပေါ်လာသော အလင်းရောင်အကူအညီဖြင့် ဘုရားရုပ်ပွားတော်ကို အာရုံပြုရသည်။
၂။ ပုံတော်မှ ဂုဏ်တော်သို့ ပြောင်းရှုခြင်း
- ရုပ်ပွားတော်ကို သက်တော်ထင်ရှားဘုရားဟု အမှတ်ပြု၍ အာရုံယူပြီး၊ ထင်ရှားမြင်လာသောအခါ ဂုဏ်တော်သို့ အာရုံပြောင်းရသည်။ ဥပမာ- “အရဟံ” ဂုဏ်တော်၏ အနက်တစ်ခုကို ရွေးချယ်၍ “အရဟံ-အရဟံ” ဟု နှလုံးသွင်းသည်။
- သမာဓိအားကောင်းလာသောအခါ ပုံတော်ပျောက်၍ ဂုဏ်တော်အာရုံ၌ ဘာဝနာစိတ် ငြိမ်ဝပ်စွာ ကပ်တည်သည်။
၃။ ဥပစာရသမာဓိသို့ ဆိုက်ရောက်ခြင်း
- ဂုဏ်တော်အာရုံ၌ ဘာဝနာစိတ်ကို တစ်နာရီခန့် ငြိမ်ဝပ်စွာ ကပ်တည်နိုင်ပါက၊ နီဝရဏများ ကွာကျလျက် ဥပစာရသမာဓိသို့ ဆိုက်ရောက်သည်။ ဈာန်အင်္ဂါ (၅) ပါး ထင်ရှားလာသော်လည်း၊ အပ္ပနာဈာန်သို့ မရောက်ဘဲ ဥပစာရဈာန်သာ ဖြစ်သည်။
၄။ ကျန်ဂုဏ်တော်များကို ဆက်လက်ပွားများခြင်း
- “အရဟံ” ဂုဏ်တော်တွင် ကျွမ်းကျင်ပြီးပါက၊ “သမ္မာသမ္ဗုဒ္ဓေါ” စသည့် ကျန်ဂုဏ်တော်များကို နည်းတူ ပွားများပြီး ဝသီဘော်အောင် လေ့ကျင့်ရသည်။
ဂုဏ်တော်ကို အာရုံပြုသော နာမ်တရား
[ပြင်ဆင်ရန်]ဗုဒ္ဓါနုဿတိသည် ဥပစာရသမာဓိကိုသာ ရွက်ဆောင်ပေးသော ကမ္မဋ္ဌာန်းဖြစ်သည်။ ဤတွင် ဘာဝနာဇောသည် မဟာကုသိုလ် မနောဒွါရိကဇော ဖြစ်၍ (၇) ကြိမ်သာ စောနိုင်သည်။ ဇောနောင်၌ တဒါရုံ ကျခွင့် ရှိသလို မကျခွင့်လည်း ရှိသည်။
- လောကီဂုဏ်တော် (ဥပမာ- ဒါန၊ သီလ၊ ဝိပဿနာဉာဏ်) ကို အာရုံပြုပါက၊ ကာမအာရုံ ဖြစ်၍ ဝိဘူတအာရုံဆိုလျှင် တဒါရုံ ကျနိုင်ပြီး၊ အဝိဘူတအာရုံဆိုလျှင် မကျနိုင်။
- လောကုတ္တရဂုဏ်တော် (ဥပမာ- မဂ်ဉာဏ်၊ ဖိုလ်ဉာဏ်) ကို အာရုံပြုပါက၊ ကာမအာရုံ မဟုတ်သောကြောင့် တဒါရုံ မကျနိုင်ပေ။ သို့သော် ဂုဏ်တော်များသည် အတိဣဋ္ဌာရုံ (အလွန်နှစ်သက်ဖွယ်အာရုံ) ဖြစ်၍ သောမနဿတဒါရုံ (၅) မျိုးသာ ကျနိုင်သည်။ ဥပေက္ခာတဒါရုံ ကျရန် အလွန်ခက်ခဲသည်။
ဗုဒ္ဓါနုဿတိ ဇယား
ဗုဒ္ဓါနုဿတိ၏ အကျိုးကျေးဇူး
[ပြင်ဆင်ရန်]ဤကမ္မဋ္ဌာန်းကို ပွားများခြင်းဖြင့် အောက်ပါအကျိုးများ ရရှိသည်-
- ဘုရားဂုဏ်တော်ကို လေးမြတ်ယုံကြည်မှု တိုးပွားခြင်း။
- စိတ်ငြိမ်းအေးပြီး သမာဓိအား ရရှိခြင်း။
- သဒ္ဓါ၊ ပညာ စသော ကုသိုလ်တရားများ ဖြစ်ပေါ်ခြင်း။
- သေခါနီးအချိန်၌ ဘုရားဂုဏ်ကို အောက်မေ့၍ ကောင်းသော ဂတိသို့ လားနိုင်ခြင်း။
ဗုဒ္ဓါနုဿတိကမ္မဋ္ဌာန်းသည် ဘုရား၏ ဂုဏ်တော်များကို အာရုံပြု၍ စိတ်ကို ငြိမ်သက်စေပြီး ဥပစာရသမာဓိသို့ ဆိုက်စေသော ဘာဝနာတရားဖြစ်သည်။ ယောဂီသည် သမာဓိအခြေခံဖြင့် ရုပ်ပွားတော်မှ ဂုဏ်တော်သို့ အာရုံပြောင်း၍ “အရဟံ-အရဟံ” စသည်ဖြင့် ပွားများရာ၌၊ စိတ်ကြည်လင်မှုနှင့် ကုသိုလ်အကျိုးကို ရရှိသည်။ ဤကမ္မဋ္ဌာန်းကို စတုရာရက္ခတရားတစ်ခုအဖြစ် ဝိပဿနာမတိုင်မီ ကြိုတင်လေ့ကျင့်ထားသင့်ပြီး၊ ဘုရားဂုဏ်တော်၏ နက်နဲမှုကို လေးမြတ်စွာ အောက်မေ့ပွားများရန် သူတော်ကောင်းတို့အား တိုက်တွန်းပါသည်။[၃]
ဆက်စပ်ဖတ်ရှုရန်
ကိုးကား
- ↑ “ဗုဒ္ဓံ အာရဗ္ဘ ဥပ္ပန္နာ အနုဿတိ ဗုဒ္ဓါနုဿတိ” (ဝိသုဒ္ဓိ၊၁၊၁၉၁)
- ↑ အာရကတ္တာ ဟတတ္တာ စ၊ ကိလေသာရီန သော မုနိ။ ဟတသံသာရစက္ကာရော၊ ပစ္စယာဒီန စာရဟော။ န ရဟော ကရောတိ ပါပါနိ၊ အရဟံ တေန ဝုစ္စတိ။ (ဝိသုဒ္ဓိ၊၁၊၁၉၅။)
- ↑ နိဗ္ဗာန်သို့ သွားရာ တစ်ကြောင်းတည်းသောလမ်း။ ဖားအောက်တောရဆရာတော်