မာရ်စစ်တပ်
| တစ်စိတ်တစ်ပိုင်း ဖော်ပြချက် |
| ဗုဒ္ဓဘာသာ |
|---|
 |
ပါဠိစာပေများအရ မာရသေနာ ဆိုသည်မှာ မာရ်၏ စစ်သည်တော်များ သို့မဟုတ် မာရ်စစ်တပ် ဖြစ်ကြပြီး၊ ၎င်းတို့သည် ကိလေသာ (စိတ်ညစ်ညူးမှုများ) ကို ဆိုလိုသည်။ ဆိုလိုသည်မှာ မာရ်၏ စစ်သည်တော်များသည် လူတို့အား ကိလေသာတရားများဖြင့် နှောင့်ယှက်ဖျက်ဆီးကာ နိဗ္ဗာန်သို့ မရောက်အောင် တားဆီးကြသူများ ဖြစ်ကြသည်။ [၁] နေက္ခမ္မပါရမီ ကျင့်ကြံမှုဖြင့် ဤအတားအဆီးများကို ကျော်လွှားရမည်ဖြစ်သည်။ ကျမ်းဂန်များတွင် မာရ်နတ်၏ တပ်မကြီး ဆယ်တပ်ကို ဖော်ပြထားသည်။ [၂]
မာရ်နတ်၏ တပ်မကြီး ဆယ်တပ်
[ပြင်ဆင်ရန်]အောက်တွင် မာရ်နတ်၏ တပ်မကြီး ဆယ်တပ်ကို ဖော်ပြထားသည်။ တစ်ခုချင်းစီသည် လူတစ်ဦး၏ စိတ်အား အနှောင့်အယှက်ပေးပြီး ကောင်းမှုလုပ်ငန်းများမှ လမ်းလွဲစေနိုင်သည်။ [၃]
- ဝတ္ထုကာမ နှင့် ကိလေသာကာမ - ပစ္စည်းဥစ္စာ နှင့် ကာမဂုဏ်များကို တပ်မက်ခြင်း။ ဤတပ်မသည် လောကီအာရုံများတွင် စွဲလမ်းမှုကို ဖြစ်စေသည်။
- အရတိ (မမွေ့လျော်ခြင်း) - လုပ်ငန်းတွင် စိတ်မဝင်စားခြင်း၊ ပျင်းရိခြင်း။ အများအကျိုးအတွက် လုပ်ဆောင်ရာတွင် စိတ်ဝင်စားမှု မရှိခြင်းကို ဆိုသည်။
- ခုပ္ပိပါသာ (ငတ်မွတ်ခြင်း) - အခြေခံလိုအပ်ချက်များ မပြည့်စုံခြင်းကြောင့် စိတ်ဓာတ်ကျဆင်းမှု။ မိမိအကျိုးမရှာဘဲ အများအတွက် လုပ်ဆောင်ရာတွင် တွေ့ရတတ်သည်။
- တန္ဒိ (ပျင်းရိခြင်း) - လုပ်ငန်းတွင် အပြည့်အဝ မကြိုးစားဘဲ သက်သက်သာသာ နေလိုခြင်း။ တာဝန်ကြီးလွန်းသဖြင့် အားထုတ်မှု လျော့နည်းလာခြင်းဖြစ်သည်။
- ထိနမိဒ္ဓ (ငိုက်မျဉ်းခြင်း) - ပင်ပန်းလွန်း၍ အိပ်ငိုက်ခြင်း။ ကြိုးစားမှု ဆက်လက်မလုပ်နိုင်ခြင်းကို ဖြစ်စေသည်။
- ဘီရူ (ကြောက်ရွံ့ခြင်း) - ကျန်းမာရေး သို့မဟုတ် အခြားအကြောင်းများကြောင့် ကြောက်ရွံ့မှု။ လုပ်ငန်းကို စွန့်လွှတ်လိုစိတ် ဖြစ်ပေါ်စေသည်။
- ဝိစိကိစ္ဆာ (ယုံမှားမှု) - လုပ်ငန်း၏ အောင်မြင်မှု သို့မဟုတ် ရလဒ်အပေါ် ယုံမှားသံသယဖြစ်ခြင်း။ ယုံကြည်မှု မခိုင်မာခြင်းကို ဆိုသည်။
- မက္ခ နှင့် ထမ္ဘ - ရှေ့သွားပုဂ္ဂိုလ်များ၏ ကျေးဇူးကို မထီမဲ့မြင်ပြုခြင်း (မက္ခ) နှင့် မိမိကိုယ်ကို ချီးကျူးခြင်း (ထမ္ဘ)။ မောက်မာမှုကို ဖြစ်စေသည်။
- တဏှာ နှင့် မာန - ပရိသတ်၊ လာဘ်လာဘ များကို တွယ်တာခြင်း (တဏှာ) နှင့် အထင်ကြီးခြင်း (မာန)။ အောင်မြင်မှုကြောင့် စွဲလမ်းမှု ဖြစ်ပေါ်လာသည်။
- အတ္တုက္ကံသန နှင့် ပရဝမ္ဘန - မိမိ၏ဂုဏ်ကို ထုတ်ဖော်ပြောဆိုခြင်း (အတ္တုက္ကံသန) နှင့် သူတစ်ပါးကို နှိမ်ချခြင်း (ပရဝမ္ဘန)။ မိမိကိုယ်ကို မြှောက်ပြီး သူတစ်ပါးကို နိမ့်ချလိုစိတ်ဖြစ်သည်။
မာရ်နတ်၏ တပ်မကြီးများကို နိုင်နင်းနည်း
[ပြင်ဆင်ရန်]ဤတပ်မကြီးများကို ကျော်လွှားရန် နေက္ခမ္မပါရမီ ကျင့်ကြံခြင်းဖြင့် စိတ်ကို သန့်စင်အောင် ထိန်းသိမ်းရမည်။ တပ်မတစ်ခုစီကို အောင်နိုင်ရန် နည်းလမ်းများကို အောက်တွင် ဖော်ပြထားသည်။
- ပထမတပ်မ - ဝတ္ထုကာမ နှင့် ကိလေသာကာမ ကို ပယ်ရှင်းရန် လောကီအာရုံများမှ စိတ်ကို ဖယ်ထုတ်ရမည်။
- ဒုတိယတပ်မ - အရတိ ကို နိုင်ရန် လုပ်ငန်းတွင် စိတ်ဝင်စားဖွယ် "ရတိ" ကို ရှာဖွေပြီး၊ ဣန္ဒြေငါးပါးကို ဣဒ္ဓိပါဒ်အဖြစ် ပြုလုပ်ရမည်။
- တတိယတပ်မ - ခုပ္ပိပါသာ ကို နိုင်ရန် မိမိအကျိုးမရှာဘဲ အများ၏ အကျိုးအတွက် ဆက်လက် ကြိုးစားရမည်။
- စတုတ္ထတပ်မ - တန္ဒိ ကို နိုင်ရန် လုပ်ငန်းကို အပြည့်အဝ ကြိုးစားပြီး သက်သာချင်စိတ်ကို ပယ်ရမည်။
- ပဉ္စမတပ်မ - ထိနမိဒ္ဓ ကို နိုင်ရန် ပင်ပန်းလျှင် အနားယူပြီး ဆက်လက် အားထုတ်ရမည်။
- ဆဋ္ဌတပ်မ - ဘီရူ ကို နိုင်ရန် အများ၏ အကျိုးအတွက် ရည်ရွယ်သော စေတနာ စွမ်းအားကို ယုံကြည်ရမည်။
- သတ္တမတပ်မ - ဝိစိကိစ္ဆာ ကို နိုင်ရန် မိမိလုပ်ငန်းကို ယုံကြည်မှုထားပြီး ပါရမီစိတ်ဖြင့် ဆက်လုပ်ရမည်။
- အဋ္ဌမတပ်မ - မက္ခ နှင့် ထမ္ဘ ကို နိုင်ရန် သူ့ကျေးဇူးကို အသိအမှတ်ပြု၍ မိမိကိုယ်ကို မချီးမြှောက်ဘဲ နေရမည်။
- နဝမတပ်မ - တဏှာ နှင့် မာန ကို နိုင်ရန် ပရိသတ်၊ လာဘ်လာဘများကို မတွယ်တာဘဲ လုပ်ငန်းကို ဆက်လုပ်ရမည်။
- ဒသမတပ်မ - အတ္တုက္ကံသန နှင့် ပရဝမ္ဘန ကို နိုင်ရန် မိမိဂုဏ်ကို မထုတ်ဖော်ဘဲ သူတစ်ပါးကို မနှိမ်ချဘဲ နေရမည်။
နိဂုံး
[ပြင်ဆင်ရန်]မာရ်နတ်၏ တပ်မကြီး ဆယ်တပ်သည် လူသားတို့၏ ကောင်းမှုလုပ်ငန်းများတွင် အောင်မြင်မှုရရန် အဓိက အတားအဆီးများဖြစ်သည်။ ဤတပ်မကြီးများကို နိုင်နင်းရန် နေက္ခမ္မပါရမီ ကျင့်ကြံခြင်းဖြင့် စိတ်ကို ထိန်းသိမ်းပြီး၊ ပါရမီဆယ်ပါး (ဒါန၊ သီလ၊ နေက္ခမ္မ စသည်) ကို အားထုတ်ရမည်။ ဤနည်းဖြင့် မာရ်စစ်သည်များကို အောင်နိုင်ပြီး မိမိ၏ လုပ်ငန်းများကို အောင်မြင်စွာ ဆောင်ရွက်နိုင်မည်ဖြစ်သည်။
ဆက်စပ်ဖတ်ရှုရန်
ကိုးကား
- ↑ မာရသေနာ (ထီ) [မာရ+သေနာ] မာရ်မင်း၏ စစ်သည်၊ မာရ်စစ်သည်။ သေနာ ဝုစ္စတိ မာရသေနာ။ မဟာနိ။၇၃။ စူဠနိ။၁၁၄။ (-ဝိ၊၃။၂။ ဒီ၊ဋ္ဌ၊၁၊၁။) မာရသေနာတိ မာရဿ သေနာ ဝစနကရာ ကိလေသာ။ မဟာနိ၊ဋ္ဌ။၂၀၃။ (-ဝိ၊ဋ္ဌ၊၃၊၂၃၇။ သီ၊ဋီ၊ သစ်၊၁၊၂၁။)
- ↑ ဣတိ-ပါ-၂၂၂၊ ဣတိ-ဋ္ဌ-၁၆၄။ သုတ္တ-ပါ-၃၄၂၊ သုတ္တ-ဋ္ဌ-ဒု-အုပ်-၁၁၇။ ထေရ-ဋ္ဌ-ပ-အုပ်-၆၀။ စူဠနိ-ပါ-၁၁၄။ မဟာနိ-ပါ-၇၃၊ မဟာနိ-ဋ္ဌ-၂၀၂။
- ↑ ဗုဒ္ဓ လောကသားတို့၏ အနှိုင်းမဲ့ကျေးဇူးရှင် ကိုယ်ကျင့်ဗုဒ္ဓဝင် ဦးရွှေအောင် သကျသီဟဓမ္မာစရိယ(ဝဋံသကာ)စေတီယင်္ဂဏ ဓမ္မာစရိယ အစိုးရဓမ္မာစရိယ(သိရောမဏိ)မဟာဝိဇ္ဇာ(သက္ကဋ)