တောင်ပြုံးမင်းလေး

တောင်ပြုံးမင်းနှစ်ပါးနှင့် မယ်တော် မယ်ဝဏ္ဏ

ရွှေဖျဉ်းကြီးနှင့် ရွှေဖျဉ်းငယ်နတ်တို့သည် ပုဂံအနော်ရထာမင်းလက်ထက်(၄ဝ၆-၄၃၉) သထုံမြို့မှ ကုလားဗျတ္တနှင့်ပုပ္ပါးပန်းစားဘီလူးမတို့၏သားများဖြစ်သည်။ တောင်ပြုံးအရပ်တွင် အနော်ရထာမင်းဘုရားတည်ရာ၌ အုတ်နှစ်ချပ်လစ်လပ်သည်ဆို၍ ဘုရင်ကကွပ်မျက်ရာမှနတ်ဖြစ်သည်ဟုဆိုသည်။ ရွှေဖျဉ်းကြီးနတ်ရုပ်မှာ အောက်ခုံဇွန်းရိုးပလ္လင်ပြန့်ပေါ်တွင် လက်ျာဒူးထောင်၍ လက်ဝဲဒူးလှဲပြီးလျှင် ယာလက်ကဓားထမ်းကာ ဝဲလက်က ပေါင်ကိုထောက်ကာထောက်ထားသည်။ ဗောင်းနားတောင်း လက်ကောက်တန်ဆာနှင့်ရှိသည်။ ရွှေဖျဉ်းငယ်အတွက်လည်း ပုံအနည်းငယ် ငယ်သည်မှတစ်ပါး ရွှေဖျဉ်းကြီး အတိုင်းထုလုပ်ရသည်။

နတ်ချင်းများ

နတ်ပင့်

မြို့ရွှေပြုန်း မောင်ဘုန်းတဲ့ ညီနောင်၊ ခမောက်ရယ် သပြေရောင်နှင့်၊ နေညိုညို ဟိုခန်းဝမှာ ဗောင်းပိတ်စထောင်၊ မှုတော်ရယ်အောင် နောင်တော်နဲ့ညီလေး၊ ဂမုန်းအင် သန့်စင်ပန်းရယ်နဲ့၊ ပြည်သူကို ရေစင်ဖြန်းတယ် ပန်းတော်ဆက်သွေး။

တောင်ပြုန်းမင်းလေး နတ်ချင်း

တို့ညီနောင် စွမ်းတဘောင်သယ်ဆောင်၊ ဘုန်းခေါင်ရဲ့ လက်ရုံး၊ ပွဲရတောင်ပြုန်း။

ပုဆိုးစွန်တောင် သက်တံ့သွေးနဲ့၊ ရွှေဘုန်းရှင့်မြေး၊ လူပုံကယဉ်၊ လူပုံကယဉ်၊ ယှဉ်ပြိုင်သူအဟုတ်ရှား၊ ရွှေပုပ္ပါးမြို့သား။

ပုဆိုးစွန်တောင် သက်တံ့သွေးနဲ့၊ ရွှေဘုန်းရှင့်မြေး၊ လူပုံကယဉ်၊ လူပုံကယဉ်၊ ယှဉ်ပြိုင်သူအဟုတ်ရှား၊ အမေပုပ္ပါးကဖွား။

နှစ်ပါးတကယ်ထူးပါသကွဲ့၊ ကစားရယ်ကြူးပါသတဲ့၊ မူးသလားလို့ မမေးနဲ့ကွယ်၊ ထူးခြားတဲ့မြေးနှစ်သွယ်။

နှစ်ပါးတကယ်ထူးပါသကွဲ့၊ ကစားရယ်ကြူးပါသတဲ့၊ မူးသလားလို့ မမေးနဲ့ကွယ်၊ ထူးခြားတဲ့မြေးနှစ်သွယ်။

ငွေသပြာထွေခင်းလို့၊ မေကညာခြွေတသင်းတို့၊ ထန်းရည်ခါးဆို ဆွေတသင်းမို့၊ မောင်မင်းကြိုက်တယ် မင်းကြိုက်တယ်လေး။ မောင်မင်းကြိုက်တယ် မင်းကြိုက်တယ်လေး။

ငွေသပြာထွေခင်းလို့၊ မေကညာခြွေတသင်းတို့၊ ထန်းရည်ခါးဆို ဆွေတသင်းမို့၊ မောင်မင်းကြိုက်တယ် မင်းကြိုက်တယ်လေး။ မောင်မင်းကြိုက်တယ် မင်းကြိုက်တယ်လေး။

ပွဲလယ်လယ်တင့်၊ ရွှေမျက်နှာတော်တွေပွင့်ပါတဲ့၊ ရွှေပြုန်းသူတို့ ဝိုင်းဝိုင်းလည်၊ မရွှေချောတို့ ဝိုင်းဝိုင်းလည်။

ဇမ္ဗူမှာ မတူရှား၊ သူတို့လိုလူနှစ်ယောက်သား၊ ယောက်ျားမတထောင် တကောင်ဖွား။

ရွှေပြုန်းရွာ

အနော်ရထာ အရေးတော်များ၊ အလေးတော်ထားလို့ ချေမှုန်းလာ ချေမှုန်းလာ၊ မြေးတော်နှစ်ပါးရဲ့ ရွှေဘုန်းသမ္ဘာ၊ မန်းမြို့မှာ မဝေးကာသွားရအောင်၊ ပေးကာသနားတဲ့ ရွှေပြုန်းရွာ။ အနော်ရထာ အရေးတော်များ၊ အလေးတော်ထားလို့ ချေမှုန်းလာ ချေမှုန်းလာ၊ မြေးတော်နှစ်ပါးရဲ့ ရွှေဘုန်းသမ္ဘာ၊ မန်းမြို့မှာ မဝေးကာသွားရအောင်၊ ပေးကာသနားတဲ့ ရွှေပြုန်းရွာ။

ရောက်ဖူးသလား ရောက်ကြဖူးသလား၊ ရှက်တတ်ရင် သွားပါရိုးလား၊ ကြောက်တတ်ရင်သွားပါရိုးလား၊ စတတ်တယ်ရယ်ပ ရှောင်မပုန်းသာ၊ မတ္တရာနယ်က တောင်ပြုန်းရွာ။ ရောက်ဖူးသလား ရောက်ကြဖူးသလား၊ ရှက်တတ်ရင် သွားပါရိုးလား၊ ကြောက်တတ်ရင်သွားပါရိုးလား၊ စတတ်တယ်ရယ်ပ ရှောင်မပုန်းသာ၊ မတ္တရာနယ်က တောင်ပြုန်းရွာ။

နေနှုန်းပမာ အညာမြေကြော၊ ရွှေပြုန်းရွာ ဘာတွေပေါ၊ နေနှုန်းပမာ အညာမြေကြော၊ ရွှေပြုန်းရွာ ဘာတွေပေါ၊ ထန်းရည်အရက်ပေါတယ်လေ၊ ထန်းရည်အရက်ပေါတယ်လေ၊ အညာစလူမုန့်နဲ့ ရှောက်ပန်းသီးပေါတယ်၊ အညာစလူမုန့်နဲ့ ရှောက်ပန်းသီးပေါတယ်။

ရှောက်ပန်းခွေ၊ မောင်အပန်းပြေဖို့၊ ရှောက်ပန်းခွေ၊ မောင်အပန်းပြေဖို့၊ မေဝယ်ခဲ့မယ်လေး၊ ရွှေပြုန်းခေါ်သည်ပွဲက၊ တောင်ပြုန်းခေါ် သည်ပွဲက၊ မယ်ဝယ်ခဲ့မယ်လေး။ မယ်ဝယ်ခဲ့မယ်လေး။