လယ်တွင်းသား စောချစ်

လယ်တွင်းသားစောချစ်
အလင်္ကာကျော်စွာ စည်သူ; လယ်တွင်းသားစောချစ်; (အမျိုးသားစာပေတစ်သက်တာဆုရ၊ ဝိဇ္ဇာပညာထူးချွန်(ဒုတိယအဆင့်))
အမည်ရင်း	ဦးတင်လှိုင်
မွေးဖွား	၁၂ ဧပြီ၊ ၁၉၄၁ (အသက် ၈၃); ထန်းတောရွာ၊ စဉ့်ကိုင်မြို့နယ်
အလုပ်အကိုင်	စာရေးဆရာ
ပညာရေး	B.A. (Myanmar)
မိခင်ကျောင်း	မန္တလေးတက္ကသိုလ်၊ မြန်မာစာဌာန
ရရှိသည့်ဆုများ	စာပေဗိမာန်ဆု (၁၉၇၇၊ ၁၉၇၈၊ ၁၉၈၈); အမျိုးသား စာပေဆု (၁၉၈၀၊ ၁၉၈၉၊ ၂၀၁၃); ဆရာဝန်တင်ရွှေစာပေဆု (၂၀၀၂); အမျိုးသားစာပေတစ်သက်တာဆု(၂၀၁၃); စည်သူဘွဲ့(၂၀၁၃); အလင်္ကာကျော်စွာဘွဲ့(၂၀၂၂);
တက်ကြွလှုပ်ရှားနှစ်များ	၁၉၇၇-လက်ရှိ
အိမ်ထောင်ဖက်	ဒေါ်မြင့်မြင့်
ဆွေမျိုးသားချင်း	အဖ - ဦးချစ်စိန် ၊ အမိ ဒေါ်စောရှင်

လယ်တွင်းသားစောချစ် (၁၂ ဧပြီ ၁၉၄၁ မွေးဖွား)သည် မြန်မာနိုင်ငံသား အမျိုးသားစာပေဆုရ စာရေးဆရာတစ်ဦးဖြစ်သည်။ အမျိုးသားစာပေဆု၊ အမျိုးသားစာပေတစ်သက်တာဆုများအပါအဝင် စာပေဆိုင်ရာဆုများစွာ ရရှိခဲ့သူ ဖြစ်သည်။ ထို့အပြင် ၂၀၁၃ ခုနှစ်တွင် စည်သူဘွဲ့၊ ၂၀၂၂ ခုနှစ်တွင် အလင်္ကာကျော်စွာဘွဲ့ ဖြင့် ချီးမြှင့်ခံခဲ့ရသည်။ ယခုအချိန်ထိ ဝတ္ထုတိုပေါင်းချုပ် ၁၇ အုပ်၊ သုတ/ရသစာပေ ၂၉ အုပ်၊ လုံးချင်းဝတ္ထု ၅၁ အုပ်၊ စုစုပေါင်း စာအုပ် ၉၇ အုပ် ရေးသားထုတ်ဝေပြီး ဖြစ်သည်။ ‘မုန်းပင်မုန်းလည်း ချစ်ထုံးမပြေ၊ ရွှေမြင်းမိုရ် ပြိုမှာ စိုးတယ်၊ ကျွန်တော်အမုန်းဆုံး ကျွန်တော်၊ ပန်း ဖြစ်သွားသောပါး၊ ပန်းပေါက်ပွဲ၊ ဒုတိယနေရာမှ ပထမလူ၊ မင်းနေရာမှာ ငါဆိုရင်၊ နှလုံးသား မလှသူ မဖတ်ရ၊ ပန်းမြိုင်လယ်မှဥယျာဉ်မှူး၊ လွမ်းစေတီ နှင့် စမ်းရေကြည်၊ မျက်လုံးမှာအလွမ်း နှုတ်ခမ်းမှာ မာန၊ မောင်နွေဦးနှင့်မဖူးဝေ” စသည့် ဝတ္ထုများကို ရုပ်ရှင်နှင့် ဗီဒီယိုများ ရိုက်ကူးနိုင်ခဲ့သည်။

အစောပိုင်းဘဝ နှင့် ပညာရေး

၁၉၄၁ - ခုနှစ်၊ ဧပြီလ(၁၂)ရက်နေ့တွင် ကျောက်ဆည်ခရိုင်၊ စဉ့်ကိုင်မြို့နယ်၊ ထန်းတောရွာ၌ အဖ-လယ်သမား ကြီး ဦးချစ်စိန်၊ အမိ-ဒေါ်စောရှင်တို့က ဖွားမြင်သည်။ နာမည်အရင်းမှာ ဦးတင်လှိုင် ဖြစ်သည်။၁၉၄၆ - (၅)နှစ်သားအရွယ်တွင် ဖခင်ကွယ်လွန်သောအခါ၊ ထန်းတောရွာနှင့် (၂)မိုင်ခန့်သာကွာသည့် ဝန်းသိုရွာသို့ ပြောင်းရွှေ့နေထိုင်ခဲ့သည်။ မိခင်၏ဇာတိရွာဖြစ်သည့် ဝန်းသိုရွာမှာပင် အဘိုးဖြစ်သူ ကျောင်းအုပ်ဆရာကြီး ဦးဖိုးသာနှင့် အဘွား ဒေါ်သောင်တို့က မွေးစား၍ ပညာသင်ပေးခဲ့သည်။ အဖေကြီး(အဖိုး)ဖြစ်သူမှာ မူလတန်းကျောင်းအုပ်ဆရာကြီးဖြစ်၍ အဖေကြီးကျောင်းမှာပင် မူလတန်းပညာသင်ယူအောင်မြင်ခဲ့သည်။

၁၉၅၂ ခုနှစ်တွင် စဉ့်ကိုင်မြို့၊ ဝန်းသိုရွာမူလတန်းကျောင်းတွင် စတုတ္ထတန်းအောင်မြင်ခဲ့သည်။ ၁၉၅၃ - ၅၇ တွင် စဉ့်ကိုင်မြို့၊ အစိုးရအထက်တန်းကျောင်း၌ ပညာသင်ယူခဲ့သည်။ ၁၉၅၈ - ကျောက်ဆည်မြို့၊ ပြည်လုံးနိုင် အလွတ်ပညာသင် အထက်တန်းကျောင်းသို့ ပြောင်းရွှေ့ပညာသင်ခဲ့ပြီး ထိုကျောင်းမှ အထက်တန်းကျောင်းထွက်လက်မှတ်ရ စာမေးပွဲအောင်မြင်ခဲ့သည်။

၁၉၅၉-၆၄ တွင် ပြည်လုံးနိုင်ကျောင်းတွင် အလယ်တန်းပြဆရာအဖြစ်ဆောင်ရွက်ခဲ့သည်။

၁၉၆၃ ခုနှစ်တွင် မြန်မာ့အလင်းသတင်းစာ(သီတင်းကျွတ်လပြည့် အထူးထုတ်)တွင် နောင်တအမည်ရှိ ဝတ္ထုတိုဖော်ပြ ခြင်းခံရ။ (ပထမဆုံး ပုံနှိပ်ခံရသည့် ဝတ္ထုတိုဖြစ်သည်။)

၁၉၆၄ ခုနှစ်တွင် ဆယ်တန်းစာမေးပွဲကို ပြန်လည်ဖြေဆိုအောင်မြင်ပြီး ၁၉၆၅ ခုနှစ်တွင် မန္တလေးတက္ကသိုလ်သို့ တက်ရောက်ခဲ့သည်။ ၁၉၆၅ - ၁၉၆၈ နှစ်များတွင် တက္ကသိုလ်လူရည်ချွန်ဆု ၂ ကြိမ် ရရှိခဲ့သည်။ ၁၉၆၈ ခုနှစ်တွင် မြန်မာစာအဓိကဖြင့် ဘွဲ့ရရှိခဲ့သည်။

ထမ်းဆောင်ခဲ့သော ရာထူးများ

၁၉၆၉ ခုနှစ်တွင်၊ မန္တလေးတိုင်း၊ ပုသိမ်ကြီးမြို့နယ်၊ ကျောက်မီးရွာတွင် အလယ်တန်းပြတာဝန်ကို စတင်ထမ်းဆောင်ခဲ့သည်။ ၁၉၇၁ ခုနှစ်တွင် ဗဟိုနိုင်ငံရေးတက္ကသိုလ်(မင်္ဂလာဒုံ) တွင် လက်ထောက်ကထိက ရာထူးဖြင့်တာဝန်ထမ်းဆောင်ခဲ့သည်။ ၁၉၈၅ ခုနှစ်တွင် ပြည်ထဲရေးဝန်ကြီးဌာနတွင် ဒုတိယလက်ထောက်ညွှန်ကြားရေးမှူးတာဝန်ဖြင့် စာပေစိစစ်ရေးနှင့်မှတ်ပုံတင်ဌာနတွင် တာဝန်ထမ်းဆောင်ခဲ့သည်။၁၉၉၂ ခုနှစ်တွင် အထွေထွေအုပ်ချုပ်ရေး ဦးစီးဌာနတွင် လက်ထောက်ညွှန်ကြားရေးမှူးတာဝန်ကို ထမ်းဆောင်ခဲ့သည်။ ၁၉၉၅ ခုနှစ်တွင် ဒုတိယညွှန်ကြားရေးမှူးတာဝန်ဖြင့် ရန်ကုန်တိုင်း၊ အင်းစိန်ခရိုင်အုပ်ချုပ်ရေးမှူးအဖြစ် တာဝန်ထမ်းဆောင်ခဲ့သည်။ ၁၉၉၆ ခုနှစ်တွင် ကချင်ပြည်နယ်အုပ်ချုပ်ရေးမှူး (တိုင်းမင်းကြီး)အဖြစ် တာဝန်ထမ်းဆောင်ခဲ့သည်။ ၁၉၉၈ ခုနှစ်တွင် အထွေထွေအုပ်ချုပ်ရေးဦးစီးဌာန(ရုံးချုပ်တွင်) ညွှန်ကြားရေးမှူး တာဝန်ထမ်းဆောင်ခဲ့သည်။ ၂၀၀၁ ခုနှစ်တွင် နိုင်ငံဝန်ထမ်းအဖြစ်မှ အငြိမ်းစားယူခဲ့သည်။

စာပေတာဝန်အဖြစ် မင်္ဂလာဒုံမြို့နယ် စာပေလုပ်သားအဖွဲ့ဥက္ကဋ္ဌ၊ မြန်မာနိုင်ငံစာပေနှင့် စာနယ်ဇင်းအဖွဲ့ ဗဟိုအမှုဆောင်၊ ဒုတိယ ဥက္ကဋ္ဌနှင့် ဥက္ကဋ္ဌတာဝန်များကို ထမ်းဆောင်ခဲ့သည်။ထို့ပြင် မြန်မာနိုင်ငံ စာရေးဆရာအသင်းဥက္ကဋ္ဌ၊ အမျိုးသားစာပေဆု စိစစ်ရွေးချယ်ရေးကော်မတီ တွင် ဒုတိယဥက္ကဋ္ဌ၊ မြန်မာနိုင်ငံ စာနယ်ဇင်းကောင်စီ (ယာယီ)တွင် အမှုဆောင်အဖွဲ့ဝင် တာဝန် များကို ထမ်းဆောင်ခဲ့ပြီး စာပေများ ဆက်လက်ရေးသား လျက်ရှိသည်။

မိသားစု

၁၉၇၁ ခုနှစ်တွင် အလယ်တန်းပြဆရာမ ဒေါ်မြင့်မြင့်နှင့် လက်ထပ်ခဲ့ပြီး သားသမီး နှစ်ဦး ထွန်းကားခဲ့သည်။

ရရှိခဲ့သော ဆု၊ တံဆိပ်များ

၂၀၁၃ ခုနှစ်တွင် စည်သူဘွဲ့ ချီးမြှင့်ခြင်းခံခဲ့ရသည်။ ထို့အပြင် ၂၀၂၂ ခုနှစ်တွင် အလင်္ကာကျော်စွာဘွဲ့ ကိုထပ်မံချီးမြှင့်ခြင်းခံခဲ့ရသည်။

စာပေဆုများ

လယ်တွင်းသားစောချစ်သည် ၁၉၇၇ ခုနှစ်တွင် တစ်လုံးနှစ်လုံး ပုလဲကုံး စာမူဖြင့် စာပေဗိမာန် ဝတ္ထုတိုပေါင်းချုပ်(ဒုတိယ)ဆုရရှိခဲ့သည်။ ၁၉၇၈ ခုနှစ်တွင် ပန်းမြိုင်လယ်မှဥယျာဉ်မှူးစာအုပ်ဖြင့် စာပေဗိမာန်စာမူဆု ကိုရရှိခဲ့သည်။ ထို့အပြင် ယင်းစာအုပ်ဖြင့်ပင် ၁၉၈၀ ခုနှစ်တွင်ချီးမြှင့်သည့် အမျိုးသားစာပေဆုကို ရရှိခဲ့သည်။ ထို့အပြင် ၁၉၈၉ ခုနှစ်တွင် ပန်းလိုချင် အပင်ကိုပျိုးတတ်မှ စာအုပ်ဖြင့် အမျိုးသားစာပေဆုကို ထပ်မံရရှိခဲ့သည်။ ၂၀၁၃ ခုနှစ်တွင် အမျိုးသားစာပေတစ်သက်တာဆုကို ရရှိခဲ့သည်။၁၉၇၇ ခုနှစ်တွင် တစ်လုံးနှစ်လုံး ပုလဲကုံး စာမူဖြင့် စာပေဗိမာန် ဝတ္ထုတိုပေါင်းချုပ် ဒုတိယဆုရသည်။

၁၉၉၁ ခုနှစ်တွင် စာပေခရီးအဖြစ် တရုတ် ပြည်သူ့သမ္မတနိုင်ငံ၊ ထိုင်းနိုင်ငံ၊ စင်ကာပူနိုင်ငံ၊ မလေးရှားနိုင်ငံများသို့ သွားရောက်ခဲ့သည်။၂၀၀၃ ခုနှစ်တွင် ဥပဓိရုပ်စာအုပ်ဖြင့် ဆရာဝန်တင်ရွှေ စာပေဆု ရရှိခဲ့သည်။၂၀၀၈ ခုနှစ်တွင် ဝိဇ္ဇာပညာထူးချွန်ဆု (ဒုတိယအဆင့်) ကိုရရှိခဲ့သည်။ ၂၀၁၂ ခုနှစ်တွင် ပျော်မွေ့ဖွယ်ရာ တို့တောရွာ မြန်မာ့ရိုးရာဓလေ့များ စာအုပ်ဖြင့် ထွန်းဖောင်ဒေးရှင်းစာပေဆု ရရှိသည်။ ၂၀၁၃ ခုနှစ်တွင် အမျိုးသားစာပေတစ်သက်တာဆု ချီးမြှင့်ခြင်းခံရသည်။ ၂၀၁၅ ခုနှစ်တွင် The Gardener among the flowers (ပန်းမြိုင်လယ်မှ ဥယျာဉ်မှူး) စာအုပ်ဖြင့် Southeast Asian Writers Award ရရှိခဲ့သည်။၂၀၁၇ ခုနှစ်တွင် ထွန်းဖောင်ဒေးရှင်း တစ်သက်တာစာပေဆုကိုလည်း ချီးမြှင့်ခြင်းခံခဲ့ ရသည်။

ရေးသားခဲ့သည်များ

၁၉၆၀ ပြည့်နှစ် သီတင်းကျွတ်လပြည့်နေ့ အထူးထုတ် မြန်မာ့အလင်းသတင်းစာတွင် “နောင်တ ́ အမည်ရှိ ဝတ္ထုတိုဖြင့် စာရေးခြင်းကို စတင်ခဲ့သည်။
၁၉၇၇ - တစ်လုံးနှစ်လုံး ပုလဲကုံးစာမူဖြင့် စာပေဗိမာန် ဝတ္ထုတိုပေါင်းချုပ်(ဒုတိယ)ဆုရရှိ။
၁၉၇၈ - ပန်းမြိုင်လယ်မှ ဥယျာဉ်မှူးစာမူဖြင့် စာပေဗိမာန် စာပဒေသာ(ပထမ)ဆုရရှိ။
၁၉၈၀ - ပန်းမြိုင်လယ်မှ ဥယျာဉ်မှူး စာအုပ်ဖြင့် အမျိုးသားစာပေဆု ထပ်မံရရှိ။ (ထိုစာအုပ်ကို ၁၉၈၂၊ ၁၉၈၄၊ ၁၉၈၆၊ ၁၉၈၇၊ ၁၉၉၀၊ ၁၉၉၃၊ ၁၉၉၅၊ ၁၉၉၈၊ ၂၀၀၁-တို့တွင် ပြန်လည်ရိုက်နှိပ်ခဲ့။)
၁၉၈၃ - နှစ်ကိုယ်တူသွားရာလမ်းဝယ်လုံးချင်း ဝတ္ထုထွက်။(၁၉၉၄-တွင် ဒုအကြိမ် ပြန်ရိုက်ခဲ့။)
၁၉၈၄ - မုန်းပင်မုန်းလည်း ချစ်ထုံးမပြေ ဝတ္ထုထွက်။ (ထိုဝတ္ထုကို ဗီဒီယိုရိုက်။)
၁၉၈၅ - [ရွှေမြင်းမိုရ် ပြိုမှာစိုးတယ်ဝတ္ထုထွက်။ (ထိုဝတ္ထုကို ဗီဒီယိုရိုက်ခဲ့။) (၁၉၉၅-တွင် ဒု-အကြိမ်ပြန်ရိုက်ခဲ့။) ပန်းလှေကားနဲ့တက်ပါ့ မယ်ဝတ္ထုထွက်။(၁၉၉၄-ဒုအကြိမ်)။
၁၉၈၆ - အကျည်းတန်ပန်း လုံးချင်းဝတ္ထုထွက်။ မငိုတတ်သော မိန်းကလေး(ဝတ္ထုတိုပေါင်းချုပ်)ထွက်။
၁၉၈၇ - ချစ်သူ့မာယာ အလင်္ကာဝတ္ထုထွက်။
၁၉၈၈ - တစ်လုံးနှစ်လုံးပုလဲကုံး(စာပေဗေိမာန် ဒုတိယဆုရ)စာအုပ်ထွက်။
၁၉၈၉ - ပန်းလိုချင် အပင်ကိုပျိုးတတ်မှ စာအုပ်ဖြင့် အမျိုးသားစာပေဆုရရှိ။ (၁၉၉၀၊ ၉၁၊ ၉၄၊ ၉၅၊ ၉၆၊ ၉၇၊ ၉၉၊၂၀၀၁၊ ၂၀၀၂ ပြန်ရိုက်။) နှလုံးသားပဲ့တင်သံ(ဝတ္ထုတိုပေါင်းချုပ်)ထွက်။
၁၉၉၀ - ကျွန်တော်အမုန်းဆုံးကျွန်တော်ဝတ္ထုထွက်(ဗီဒီယိုရိုက်)(၁၉၉၆၊ ၂၀၀၄-တွင် ပြန်ရိုက်)။
၁၉၉၁ - မျက်လုံးမှာအလွမ်း၊ နှုတ်ခမ်းမှာမာနဝတ္ထုထွက်(၁၉၉၆-တွင်ပြန်ရိုက်။ ပန်းတွေမွှေးတဲ့ည-ပျားရည်ဆမ်းတဲ့လ ဝတ္ထုထွက်( ၁၉၉၆-ပြန်ရိုက်)။ ခေါင်းလောင်းသံချိုချို(ဝတ္ထုတိုပေါင်းချုပ်)ထွက်။
၁၉၉၂ - ပန်းပေါက်ပွဲ ဝတ္ထုထွက်။ (ဗီဒီယိုရိုက်)။(၂၀၀၄-ပြန်ရိုက်)။ ပန်းဖြစ်သွားသောငါးဝတ္ထုထွက်(ရုပ်ရှင်ကားကြီးနှင့် ဗီဒီယိုရိုက်) (၂၀၀၃-ပြန်ထွက်)။ မြစ်တစ်စင်းနှင့် နှင်းတစ်စက်(ဝတ္ထုတိုပေါင်းချုပ်)ထွက်။
၁၉၉၃ - လရောင်အောက်မှာ ချစ်တဲ့သူ၊ ပန်းသလားမေပျို(၂၀၀၅-ပြန်ထွက်)၊ ရွှေတံခါးကြီးဖွင့်ပါဦး(၂၀၀၃-ပြန် ထွက်)၊ပတ္တမြားပင်ဆင့်မြပင်မြင့် (၂၀၀၅-ပြန်ထွက်)၊ ချစ်သူ့ရင်ခွင်မှလှိုင်းအိကလေးများ(၂၀၀၃-ဒုအကြိမ်)။ ပျား ရည်မြစ်မှ အချစ်လှေ (ဝတ္ထုတိုပေါင်းချုပ်)၊ မိုးသက်လေ (ဝတ္ထုတိုပေါင်းချုပ်)၊ စကားပုံမှပေးသောအတွေးအမြင်(သုတ-ရသ) (၂၀၀၀-ဒုအကြိမ်) စသော စာအုပ်များထွက်။
၁၉၉၄ - မေတ္တာကွန်သာယာ(ဗီဒီယိုရိုက်)၊ (၂၀၀၃-ဒု)။ ဒုတိယနေရာမှ ပထမလူ(ဗီဒီယိုရိုက်)။ မင်းနေရာမှာငါဆို ရင် (ဗီဒီယိုရိုက်)၊ ရွှေစင်ပန်းခက် စသောဝတ္ထုများထွက်။ ပန်းများပွင့်စေမွှေးစေသူ(သုတ၊ရသ)စာအုပ်ထွက်။
၁၉၉၅ - မောင်နွေဦးနှင့်မဖူးဝေ(၂၀၀၃-ဒု)၊ တစ်ခုလပ်ပေမယ့်ကွက်လပ်မရှိ (ဗီဒီယိုရိုက်)(၂၀၀၃-ဒု)၊ မာယာ သည်(၂၀၀၁-ဒု)၊ လေမှာနစ်သောငှက်၊ နှလုံးသားမလှသူမဖတ်ရ(၂၀၀၁-ဒု)(ရုပ်ရှင်၊ ဗီဒီယိုရိုက်)။ ဘဝပုံရိပ်(ဝတ္ထု တိုပေါင်းချုပ်)စာအုပ်များထွက်။
၁၉၉၆ - ကာရာအိုကေပျားမလေး၊ ရင်ခွင်ဦး ရင်ခွင်ရိုင်း ရင်ခွင်လှိုင်း၊ ပျားရည်နွံအိုင်လေးထဲမှာ။ လုံးချင်းဝတ္ထုများနှင့် လုပ်ရတော့ညာလက် ရွှေဝတ်ရတော့ဘယ်လက်(ဝတ္ထုတိုပေါင်း ချုပ်)စာအုပ်များထွက်။
၁၉၉၇ - ရွှေကောဇော ရောနှောလို့ထိုင်၊ သက်သေအမှုတည်ပါစေ ဝတ္ထုများနှင့် အချစ်အိမ်လေးတည်ဆောက် မယ် (သုတ၊ရသ)(၁၉၉၈၊ ၁၉၉၉၊ ၂၀၀၂-ဒု)စာအုပ်များထွက်။
၁၉၉၈ - မနောမြေမှ မလိပန်း၊ လုံးချင်းဝတ္ထုထွက်။
၂၀၀၀ - နွေဦးလေ(ဝတ္ထုတိုပေါင်းချုပ်)ထွက်။
၂၀၀၁ - ပန်းနုရောင်မီးတောက်များ၊ လွမ်း စေတီနှင့်စမ်းရေကြည်(ဗီဒီယိုရိုက်)၊ လိမ်ညာဘေးမှဝေးပါစေ(သုတ၊ရသ) စာအုပ်များထွက်။
၂၀၀၂ - မယုံမရဲယုံမှရဲ၊ ချစ်သူနေခြည် စသောဝတ္ထုများနှင့် လူတွေ့စစ်ဆေးခြင်း(သုတ)၊ ဥပဓိရုပ်(သုတ)(ဆရာဝန်တင်ရွှေစာပေဆုရ) (၂၀၀၄ဒု-အကြိမ်)စာအုပ်များထွက်။ စာပေနှင့်စာနယ်ဇင်းဆိုင်ရာ အတတ်ပညာ နည်းပညာနှင့် သုတရသရေးသားမှု အရည်အချင်းမြင့်မားစေရန်နှင့် စာပေမျိုးဆက်သစ်များပေါ်ထွန်းလာစေရန် ဝိုင်းဝန်းကြိုးပမ်းဆောင်ရွက်ရေး(စာတမ်း)ပြုစုဖတ်ကြား။
၂၀၀၃ - ကျောက်မှော်တောမှ ဒဏ္ဍာရီနှင်းဆီ၊ လောကနတ်၏စည်းခတ်သံ(ဝတ္ထုတိုပေါင်းချုပ်)၊ ကောင်းစွာ ပြောဆိုနိုင်ပါစေ(သုတ)့စာအုပ်များထွက်။ အမျိုးသားရေးအားမာန်ဝတ္ထုများ(စာတမ်း)ပြုစုဖတ်ကြား။
၂၀၀၄ - မနောမြေမနောအလှ(သုတ)၊ ပရိသတ်ရှေ့မှာစကားပြောနည်း(သုတ)၊ မွေးမြေကိုတဲ့ပြန်လေပြီ(သုတ၊ရသ)။ စာအုပ်များထွက်။ သက်ကြီးရွယ်အိုစောင့်ရှောက်ရေးနှင့် မြန်မာ့ရိုးရာအစဉ်အလာ(စာတမ်း)ပြုစု ဖတ်ကြား။
၂၀၀၅ - ရတနာစိမ်း၊ မေတ္တာရှင်နှင့်မာယာသည် ဝတ္ထုများနှင့် မုန်တိုင်းထဲမှမိုးစက်ပွင့်(ဝတ္ထုတိုပေါင်းချုပ်)၊ မိုးစွန်တမွတ် ကြယ်ကိုဆွတ်(လူငယ်ဝတ္ထုတိုများ)၊ လယ်တွင်းသားစောချစ်ဝတ္ထုတိုများ။ စာအုပ်များနှင့် ပန်းရည် ဘဏ်စာစီစာကုံးများ၊ စားဖွယ်ပေါတဲ့တို့တောရွာ(သုတ၊ ရသ)၊ စာပန်းပွင့်ကြွေအလွမ်းပြေ၊ အမေ့ထိုင်ခုံနှင့်ခံစားမှု(သုတ၊ရသ)၊ ဝယ်သူစိတ်ကြိုက် လူ့စိတ်ကြိုက်(သုတ၊ရသ)စာအုပ်များထွက်။ ခေါင်းစီးစာသားနှင့် မူပိုင်ခွင့်(စာတမ်း)ပြုစုဖတ်ကြား။
၂၀၂၀ - ဘဝဇာတ်ခုံပေါ်မှာ စာအုပ်ထုတ်ဝေ

ကိုးကား

အချို့သောအ‌ေကြာင်းအရာများကို မလိခ၏မြန်မာဝတ ္ထုအညွှန်ပေါင်းချုပ်စာအုပ် (၂၀၁၇) မှကိုးကားထားပါသည်